Францішак фон Гуттэн-Чапскі (* 1725, † 1802), ваявода Хэлмскі, ажаніўся 1772 трэцім шлюбам з княжною Веранікаю Радзівіл (* 1754), дачкою ваяводы Віленскага і вялікага гэтмана ВКЛ князя Міхала-Казімера Радзівіла. У пасаг атрымаў маёнткі ў Вялікім Княстве Літоўскім.

Мікалай фон Гуттэн-Чапскі, былы гэнерал-маёр войскаў каронных, разам з нашчадкамі ўзьведзены 1804.09.15 у графскую годнасьць Прускага каралеўства. Ён быў пляменьнікам Францішка, ваяводы Хэлмскага. Указам 1861 ці 1862 права карыстаньня графскім тытулам пашырана на бліжэйшых сваякоў Мікалая — пляменьніка Багдана (правам прымагенітуры) і на нашчадкаў Караля і Станіслава, сыноў Францішка, ваяводы Хэлмскага. Нашчадкі Мікалая і ягонага пляменьніка жылі ў Прусіі, а Караль і Станіслаў былі падданымі Расейскай Імперыі.

Найвышэйшым указам 1874.06.12 калескаму радцу Адаму-Юзафу, з сынам Адамам, стацкаму радцу Ігнацію-Фэліцыяну і рэчаіснаму стацкаму радцу Эмерыку-Захарыяшу-Мікалаю, сыном Караля, дазволена карыстацца ў Расейскай Імперыі графскім тытулам.

Нашчадкі Караля унесены ў 5 ч. РК Менскай губ.
Вывад: 1802.12.04 (Менскі ДДС), указ 1871.10.27 № 4403 (у 6 ч. РК).

Найвышэйшым указам 1900.06.14 Станіславу-Антонію і Мікалаю, ўнукам Станіслава, дазволена карыстацца ў Расейскай Імперыі графскім тытулам. Нашчадкі Станіслава жылі ў Віленскай губ.

Аляксандар, сын Францішка і ўнук Мікалая, найвышэйшым указам 1895.06.23 атрымаў дазвол карыстацца ў Расейскай Імперыі графскім тытулам. Ён быў жанаты зь Ядвігаю Сабанскаю, дачкою Леана, маршалка шляхты Клімавіцкага пав., уладальніка маёнт. Дамамерычы і Сялішча.