Можа хто са спадароў ведае нешта пра Вінцэся (Викентия) Беразоўскага з в. Карысць Старобінскага р-ну (цяпер Салігорскі) прыкладна 1875 +/- 5 гадоў. Буду ўдзячны за інфармацыю. Вядома, што перад вайной 14 году ездзіў на заробкі ў Амэрыку.
Вядома, таксама, што Вінцэсь Беразоўскі быў жанаты на Юліі Каржанеўскай, прыкладна 1877 году нараджэння. Вінцэсь і Юля Беразоўскія нарадзілі трох дачок: Маню, Галену, Амілю.
Вінцэсь Беразоўскі двойчы ездзіў на заробкі ў Амерыку. Вядома што з Амерыкі вярнуўся і памёр на радзіме. Пахаваны ў в. Мяцявічы Старобінскага р-ну. Магіла не захавалася.
Юлія Беразоўская жыла заўжды ў в. Карысць Старобінскага р-ну. Расціла дачок, вяла гаспадарку. Атрымлівала ў м. Пагост Старобінскага р-ну грашовыя пасылкі ад мужа з Амерыкі. Вядома са словаў унукаў Юліі гісторыя як перад вайной 1914 году яна атрымала ад мужа Вінцэся 500 рублёў золатам. Нясці 5 км дамоў у Карысць з Пагосту, акрамя іншых набыткаў, шчэ' амаль палову кг золата Юліі паказалася цяжка, яна вярнулася, памяняла золата на паперкі... А праз некалькі часу распачалася вайна і залатыя манеты былі выведзены з абарачэння.
Пасля того, як у 1938 годзе яе дочкі Маня Гедрыновіч (Гідрановіч) і Аміля Астрэйка разам з мужамі былі арыштаваныя НКВД, Юлія Беразоўская, якой на той момант было ужо болей 60 год, узяла на выхаванне 5 дзяцей Мані Гедрыновіч і 2 дзяцей Амілі Астрэйка. Дакладна вядома, што Маня Гедрыновіч вярнулася з лагеру ў 1956 ці 1957 годзе... Гэта значыць, што старая жанчына Юлія Беразоўская ўратавала сваіх унукаў.
Юлія Беразоўская памёрла ў 1964 годе ва ўзросце 88 год. Апошнія 7 год была паралізаваная і нерухомая. Пахавана на Карысцкіх могілках, што паміж в.Карысць і в. Цясоў. На магіле помнік ад родных.
Маня Беразоўская выйшла замуж за Ёсіфа Гедрановіча (Гідрановіча), жылі ў в. Карысць Старобінскага р-ну. Нарадзілі 5 дзяцей Была разам з мужам арыштавана НКВД у 1938 годзе. Ёсіфа амаль адразу застрэлілі ў падвале НКВД у Слуцку. Месца пахавання невядома. Маня Беразоўская правяла ў лагерах Караганды і Краснаярскага краю спачатку 10 год па абвінавачванню у контррэвалюцыйнай дзейнасці. Вярнулася ў Карысць у 1948 годзе. Праз некалькі месяцаў зноў была арыштавана і зноў атрымала 10 год зняволяння. Вярнулася у Карысць у 1957 ці 58 годзе. Памерла ў .... годзе. Пахавана на Карысцкіх могілках. На магіле помнік ад родных. Звесткі пра лёс дзяцей і нашчадкаў Мані Беразоўскай і Ёсіфа Гедрановіча (Гідрановіча) - на саронцы
http://www.nobility.by/forum/index.php?topic=599.0 ;
Галена Беразоўская выйшла замуж за Пархімовіча, жылі ў в. Баравуха ля м. Вясея, Слуцкага р-ну. Дзяцей у іх не было. Галена, пасля таго як сястру Маню з яе мужам Ёсіфам арыштавалі энкэвэдзісты, ўзяла ў сваёй маці Юлі на выхаванне пляменніка Ўладзіміра Гідрановіча;
Аміля Беразоўская выйшла замуж за Антося Астрэйку, жылі ў в. Рэдкавічы Любаньскага р-ну. У іх была дочка Ядвіся і сын Станіслаў. Аміля і Антось былі арыштаваныя НКВД і многія гады былі у турмах і лагерах ГУЛАГа. Іх дочку Ядвісю і сына Станіслава выхоўвала Юля Беразоўская разам з пяццю дзецьмі Мані і Ёсіфа Гедрановічаў (Гідрановічаў).
Language:
